வெஸ்ட் இண்டீஸ் நாட்டில் ஆண்டுதோறும் நடைபெற்று வரும் கரீபியன் பிரீமியர் லீக் டி20 தொடர் 9வது முறையாக கடந்த ஆகஸ்ட் 26ம் தேதி துவங்கியது, மொத்தம் 6 அணிகள் பங்கேற்ற இந்த தொடரின் லீக் சுற்றின் முடிவில் புள்ளி பட்டியலில் முதல் 4 இடங்களை பிடித்த நடப்பு சாம்பியன் த்ரிபாகோ நைட் ரைடர்ஸ், கயானா அமேசான் வாரியர்ஸ், செயின்ட் கிட்ஸ் & நெவிஸ் பட்ரியொட்ஸ், செயின்ட் லூசியா கிங்ஸ் ஆகிய 4 அணிகள் அரையிறுதிக்கு முன்னேறின, ஜமைக்கா தள்ளவாஹ்ஸ் மற்றும் பார்படாஸ் கிங்ஸ் ஆகிய அணிகள் லீக் சுற்று விட்டு வெளியேறினே.
 |
| CPL 2021 Winners Saint Kitts & Nevis Patriots (CPL T20 | Getty) |
அரை இறுதி :
இதை அடுத்து நடைபெற்ற முதல் அரையிறுதிப் போட்டியில் புள்ளி பட்டியலில் 1 மற்றும் 4 ஆகிய இடங்களை பிடித்த த்ரிபாகோ நைட் ரைடர்ஸ் மற்றும் செயின்ட் லூசியா கிங்ஸ் ஆகிய மோதின, அதில் செயின்ட் லூசியா 21 ரன்கள் வித்தியாசத்தில் வெற்றி பெற்று முதல் அணியாக இறுதி போட்டிக்கு தகுதி பெற்றது.
அதன்பின் 2 மற்றும் 3வது இடங்களை பிடித்த கயானா மற்றும் செயின்ட் கிட்ஸ் ஆகிய அணிகளுக்கு இடையே நடந்த 2வது அரையிறுதிப் போட்டியில் செயின்ட் கிட்ஸ் 7 விக்கெட் வித்தியாசத்தில் வென்று இறுதிப்போட்டிக்கு முன்னேறியது.
மாபெரும் பைனல் :
இதை அடுத்து நேற்று இரவு நடைபெற்ற மாபெரும் இறுதிப் போட்டியில் செயின்ட் லூசியா கிங்ஸ் மற்றும் செயின்ட் கிட்ஸ் & நெவிஸ் பட்ரியொட்ஸ் ஆகிய அணிகள் கோப்பைக்காக பலப்பரீட்சை நடத்தின. இதில் டாஸ் வென்ற செயின்ட் லூசியா முதலில் பேட்டிங் தேர்வு செய்து செயின்ட் கிட்ஸ் பவுலர்களின் நேர்த்தியான பந்துவீச்சால் நிர்ணயிக்கப்பட்ட 20 ஓவர்களில் 159/7 ரன்கள் எடுத்தது, அதிகபட்சமாக ராகீம் கார்ன்வால் மற்றும் ராஸ்டன் சேஸ் ஆகியோர் தலா 43 ரன்களும் கீமோ பால் 39 ரன்களும் எடுத்தனர். செயின்ட் கிட்ஸ் சார்பில் நசீம் ஷா மற்றும் பாவத் அஹ்மத் ஆகியோர் தலா 3 விக்கெட் எடுத்தனர்.
செயின்ட் கிட்ஸ் சாம்பியன் :
இதை அடுத்து 160 என்ற இலக்கை துரத்திய செயின்ட் கிட்ஸ் அணிக்கு நட்சத்திர வீரர் கிறிஸ் கெய்ல் 0, எவின் லெவிஸ் 6 என சொற்ப ரன்களில் அவுட்டாகி அதிர்ச்சி அளித்தனர். இதனால் 26/2 என தடுமாறிய அந்த அணியை ஜோஸ்வா டி சில்வா 37 ரன்களும், ரூதர்போர்ட் 25 ரன்களும் எடுத்து ஓரளவு மீட்டனர், அடுத்து வந்த கேப்டன் ட்வயன் ப்ராவோ 8 ரன்களில் அவுட் ஆக ஆட்டத்தில் பரபரப்பு தொற்றிக்கொண்டது.
இறுதியில் டாமினிக் ப்ராக்ஸ் 24 பந்துகளில் 48* ரன்களும் பாபின் ஆலன் 20* ரன்கள் எடுக்க மிகச்சரியாக 19.6வது பந்தில் 160 ரன்களை எட்டிப்பிடித்த செயின்ட் கிட்ஸ் 3 விக்கெட் வித்தியாசத்தில் திரில் வெற்றி பெற்றது, இதையடுத்து பிராவோ தலைமையிலான செயின்ட் கிட்ஸ் & நெவிஸ் பட்ரியொட்ஸ் அணி கரீபியன் லீக் டி20 கிரிக்கெட் வரலாற்றில் முதல் முறையாக சாம்பியன் பட்டம் வென்று சாதனை படைத்தது, 48 ரன்கள் குவித்து வெற்றிக்கு வித்திட்ட டாமினிக் பிராக் ஆட்டநாயகன் விருதை வென்றார்.